Padi ye ya "Mpho ya moswananoši" e mabapi le mošimane yo a tsebjago ka Dimaka. O belegwe motseng wa Mawa, ka fase ga mošate wa bogoši bja Bolobedu, Seleteng sa Mopani. Dimaka o be a dula le mmagwe morago ga gore koko wa gagwe a bolawe ga sehlogo ke setšhaba sa Kheboku, ka ge a be a latofatšwa ka boloi.
Yena o be a na le bokgoni bja go ikgetha bja thuto le boetapele. Bokgoni bja gagwe bja moswananoši bo utolotšwe la mathomo ke monna wa moporofeta yoo a tsebjago ka Kgaphola. Mpho ya gagwe ya moswananoši e thomile go bonala gabotse ge e dira mphato wa bone sekolong sa tlasana sa Mawa. Bokgoni bja gagwe ka sekolong e be e le bja go makatša eke ke bja setsebi sa thuto. Morutišikgadi Ramaphoko yoo e bego e le morutiši wa Dimaka, ke yena wa mathomo wa go lemoga bokgoni bjo bja go ikgetha. Dimaka o be a kgona go iterela mešomo ya gagwe ka noši ntle le go thušwa. Bokgoni bja gagwe bo makaditše batho ba mmalwa go akaretšwa le dihlogo tša dikolo tšeo a di tsenego, e lego sa tlasana le seo se phagamego, Morena Ratlabala le Morena Moseamo.
Dimaka o rile go aloga mphatong wa bošupa sekolong sa Mawa sa tlasana a ya sekolong seo se phagamego sa Khesethwane. Ngwageng wa go latela ge a be a dira mphato wa senyane, Dimaka o ile a tsenela phenkgešano ya boetapele bja lekgotlakemedi la barutwana fao a ilego a thopa. O ile a laetša bokgoni bja boetapele bja barutwana bja go se tlwaelega, ka go tla ka mananeo a go kaonafatša maemo a thuto sekolong sa gagwe. O ile a gapeletša gore barutwana ba be karolo ya lekgotlataolo la sekolo fao a ilego a tla ka dipholisi tša go fapafapana tša go kaonafatša maemo a thuto sekolong sa gabo. O makaditše modulasetulo wa lekgotlataolo la sekolo Morena Mokgapatlala ga mmogo le maloko a gagwe, ka tsebo ya go hlatholla molaotheo wa Afrika Borwa, ACT ya dikolo le dipholisi tša kgoro ya Thuto ya motheo. Morena Mokgapatlala o ile a dumela gore boetapele bja barutwana bo be karolo ya lekgotlataolo la sekolo ka morago ga go lemoga bokgoni bja Dimaka.
Boetapele bja gagwe bo ile bja bea bophelo bja gagwe kotsing ya go bo loba, ka ge a ile a palediša kgwebo ya Sekebekwa ya diokobatši yeo e bego e sepetšwa ke motlogolo wa gagwe Tshepo. Dimaka o ile a tla ka mananeo a polokego ya barutwana, gomme seo sa dira gore kgwebo ya diokobatši e se sa tšwelapele ka sekolong. Tshepo o bethile Dimaka go šoro moo a ilego a kitimešetšwa bookelong bja Letaba ka sefatanaga sa hlogo ya sekolo Morena Moseamo. Matšatši o ile a botša hlogo ya sekolo gore otla tloša Dimaka sekolong sa Khesethwane ge ba ka se rake barutwana bao ba gobaditšego morwa wa gagwe. Dimaka o ile a ganana le kgopolo ya mmagwe ka ge a ile a lemoga gore Tshepo o be a gapeletšwa ke malome wa gagwe go dira kgwebo ka ge a se na batswadi. Tshepo o ile a hwetša thekgo ya maleba a ba a tšwelela dithutong tša gagwe ka thušo ya boetapele bja Dimaka.
Dimaka o thušitše barutwana ba mmalwa ka dithušathuto le mekgwanakgwana ya go ithuta gore ba kaonafatše dipoelo tša bona. Dipoelo tša mphato wa marematlou di ile tša kaonafala ka ngwageng wo wa boetapele bja Dimaka, gomme se se ile sa dira gore dimaka a kgethwe leboelela ngwageng wa go latela. Ka madimabe Dimaka o ile a swanelwa ke go tlogela sekolo pele a ka fihla Mphatong wa marematlou.
What's in the box
1 x Book
